世冠盃主播衣着太性感　被同行炮轟「粗俗」

今屆世冠盃喺美國舉行，天氣一直㷫合合，不過官方指定直播平台DAZN就為球迷大派冰淇淋，多位主播都以極「涼爽」造型出現喺球場做報道，其中意大利性感主播艾莉諾拉(Eleonora Incardona)喺8強戰嘅噴血服飾，就引嚟唔少爭議，更有同行公開炮轟佢「粗俗」。

意大利主播艾莉諾拉今屆世冠盃備受注目，8強巴黎聖日耳門對拜仁慕尼黑一仗，佢就着以全白色裝扮出現，上衣設計同胸圍冇分別，當佢除低件小外套，豐滿身材即表露無遺，大批網民熱烈討論：「你依家返緊工，唔係去海灘」、「你喺訪問話唔想人只係睇你外表，但就着住個胸圍入球場」，亦有人讚好回應：「你係我追睇世冠盃唯一原因」！

不過，最近出書探討足球主播風氣嘅瑞士女記者Valentina Maceri，就忍唔住向艾莉諾拉發炮：「佢主要係同DAZN嘅博彩網站合作，所以佢用最性感嘅方法去宣傳博彩，有時直頭覺得好粗俗。」Valentina喺佢本書入面，猛烈批評意大利球圈女記者賣弄性感嘅歪風。