皇馬要求西甲首仗延期　獲足總支持

正出戰世冠盃嘅皇家馬德里，距離決賽只差1步，佢哋踢完世冠盃後，同西甲新球季開咧只剩1個月多啲，球員根本冇時間休息。據報皇馬日前已正式去信西甲聯賽會，要求將首戰對奧沙辛拿延期，提議獲西班牙足總同奧沙辛拿支持。

皇馬首場聯賽對奧沙辛拿原定喺8月20日舉行，同世冠盃決賽相距5個星期左右，而西班牙球員協會早前表示，球會應確保球員喺暑假有至少6個星期休息。西班牙媒體《Carrusel Deportivo》報道，皇馬已去信西甲要求將首周賽事延期。

消息指皇馬提議將對奧沙辛拿一仗，改去10月30日踢，嗰日係西班牙盃首圈進行日子，但皇馬同奧沙辛拿都唔需要參賽。報道指西班牙足總同奧沙辛拿都支持呢個做法，所以成事機會唔細。