【有片】祖奧柏度擔正轟2球 車路士闖決賽
周三(9日)凌晨世冠盃4強，車路士憑6,000萬鎊新兵祖奧柏度「起孖」，2比0擊敗富明尼斯殺入決賽，將會同巴黎聖日耳門或皇家馬德里爭奪冠軍。祖奧柏度今場首次擔正即做英雄，為車仔進帳2,300萬鎊獎金，如果最後捧盃會再多3,000萬鎊，收購祖奧柏度嘅轉會費幾乎「回本」！
由於利安戴納停賽，上星期先至加盟嘅祖奧柏度，今場立即有擔正機會，呢位前鋒亦不負所託，18分鐘藉堤亞高施華解圍唔遠，禁區頂妙射貼柱而入；56分鐘車路士反擊，祖奧柏度單騎推入禁區狂抽破網，統計顯示個射門時速達120公里。由於祖奧柏度係富明尼斯青訓出身，所以佢兩個入波都選擇唔慶祝，以示尊重。
車路士今場贏波，勁賺2,300萬鎊晉級獎金，決賽贏埋會再多3,000萬鎊，差唔多「抵銷」車路士向白禮頓收購祖奧柏度嘅轉會費；而且車路士喺4強前已經累積6,000萬鎊獎金，意味「藍戰士」今次美國世冠盃之旅，有機會得到超過1億鎊獎金收入，非常和味。
上星期仲喺巴西度假嘅祖奧柏度，1星期內完成轉會、首演、入波、進軍決賽，呢位23歲前鋒賽後表示：「好似發夢一樣，冇其他劇本比呢個更好。我想向富明尼斯球迷道歉，不過我效力嘅係車路士，佢哋出糧畀我就係要我入波。」