實力超班　德國瑞典女足輕鬆2連勝出線

周三(9日)凌晨女子歐國盃C組，兩支勁旅德國女足、瑞典女足分途出擊一齊贏波，攜手提早1輪出線8強，並成為率先確定2個出線名額嘅組別，雙方將於下場交鋒，爭奪小組首名。

德國女足上場贈波蘭兩蛋，今場遇上丹麥女足，出現些少阻滯，首仗輸波嘅丹麥女足豁出去一搏，並於開賽26分鐘，憑前鋒雲格絲加特入波打開紀錄。

不過，身為賽事史上捧盃次數最多嘅「德女」始終技勝一籌，換邊後冇耐獲得12碼，由中場絲祖伊姬紐絲堅射入扳平，戰至66分鐘，舒卓娜建功，協助德國女足反勝2比1，呢位27歲前鋒連續2場有波入。

同組另一場，瑞典女足憑碧克絲甸紐絲、艾絲娜妮、蓮娜靴迪各入1球，以3比0大勝波蘭女足，2戰2勝兼不失球，由於瑞典女足淨得球比同分嘅德國女足多1球，下場只要打和「德女」，就可以取得小組首名。

至於丹麥女足、波蘭女足同樣2戰2敗，提早出局，雙方將於下場碰頭，只能為面子而戰，希望贏波開齋。