遭嫌棄年紀大　奧巴美揚面臨被解約

根據「轉會權威」記者羅曼諾(Fabrizio Romano)爆料，沙特阿拉伯球隊艾卡迪沙準備同36歲前鋒奧巴美揚提早1年解約，並收購其他年輕射手，提升球隊活力。據悉奧巴美揚亦同意走人，有望重返歐洲搵食。

奧巴美揚上年7月由馬賽轉投艾卡迪沙，簽約2年，呢位加蓬國腳有出色表現，上陣36場入21球及3次助攻，協助上季升班嘅艾卡迪沙爆冷獲得聯賽第4名，以及國王盃亞軍。

艾卡迪沙開始心雄，計劃今夏簽入更加年輕當打嘅球星，提升爭標本錢，考慮到奧巴美揚已經36歲，球員生涯高峰期已過，所以提出同佢解約，以便騰出資金簽入新兵，奧巴美揚亦願意以自由身離隊。

消息傳出之後，據悉已引起多間歐洲球會關注，包括AC米蘭、加拉塔沙雷、聖伊天都有意簽入奧巴美揚，現時就睇佢點樣選擇。