英格蘭女足炒荷蘭　貝芙美特贏「戀人打吡」

周四(10日)凌晨女子歐國盃D組，衞冕嘅英格蘭女足踢爭氣波，4比0大勝荷蘭女足，保住出線希望。今場大戰話題之一，係英格蘭前鋒貝芙美特同荷蘭嘅美迪瑪對決，呢對拍拖3年嘅戀人，賽後互相擁抱，貝芙美特表示會盡力去安慰另一半。

英格蘭女足首戰輸畀法國女足，今場再輸就要提早執包袱，不過佢哋就大踢爭氣波，憑蘿倫占士梅開二度，加上艾娜東妮同佐真娜絲坦威各建一功，4比0大勝荷蘭女足，依家英格蘭女足同荷蘭女足同得3分，法國女足就2戰全勝排榜首。

美迪瑪上年加盟曼城女足前，同貝芙美特喺阿仙奴女足做過7年隊友，3年前開始拍拖賽前佢話兩人相處嘅黃金定律係「唔講比賽」。貝芙美特賽後表示：「我仲未同美迪瑪正式傾過，只係畀咗佢一個擁抱，畀時間佢冷靜下。今日佢肯定唔好受，正如上場我輸波一樣，佢當時都有安慰我，所以我都會做番啲事去鼓勵佢。」