卡丹堤不甘做配角　闖英超上位爭做「一姐」

西班牙女足人才濟濟，佩泰娜絲、邦瑪迪都係「金球級」巨星，不過今屆女子歐國盃又多一個焦點，效力阿仙奴女足嘅卡丹堤光芒四射，佢上年毅然離開效力10年嘅巴塞隆拿女足，勇闖英超就係為今日嘅「女主角夢」鋪路。

29歲嘅卡丹堤之前效力巴塞女足，所有風頭都畀佩泰娜絲同邦瑪迪搶晒，卡丹堤承認上年轉投阿仙奴女足，就係希望改變情況：「當你離開原本地方，其他人就會認識你。喺巴塞實在有太多球星，鎂光燈好自然分散去唔同地方，上季我獲選英超最佳球員，仲贏歐聯冠軍，我發覺一切都已改變。」

卡丹堤喺西班牙女足仍要「讓路」畀佩泰娜絲等核心，但佢改踢右翼一樣發揮得好好，頭兩輪已有1入波同2助攻，加上上季喺阿仙奴有21個入波同16次助攻，令佢成為今年女子金球獎熱門之一。卡丹堤表示：「喺咁重要嘅獎項被人提起，係我嘅一大榮幸，但我同所有隊友一樣，依家只係想贏歐國盃冠軍。」