華荷域冇人要　祖雲達斯考慮解約

塞爾維亞前鋒杜辛華荷域，幾年前仲係意甲當時得令嘅超級射手，不過近年喺祖雲達斯發展每況愈下，即使祖記已經決定將佢送走，但市場上完場無人問津。據報祖記願意將佢免費送走，甚至傾提前解約，希望「止蝕」離場。

華荷域依家只係25歲，上季各項賽事都有17個入波，但整體演出未能令人滿意，祖記嘅未來規劃已經冇佢份。問題係華荷域年薪係意甲最高嘅1,200萬歐元，而且只剩1年合約，根本冇任何球會願意買佢，而沙特同土超球會亦被華荷域拒絕。

據意大利《天空體育》報道，祖記為咗搵人接手華荷域張「肥約」，唔介意唔收轉會費畀佢離隊，《都靈體育報》更指祖記考慮同華荷域商討提前解約，務求盡快解決問題。