國腳出征每人幾個喼？國足澄清「行李爭議」　

中國隊喺東亞錦出師不利，首仗慘吞南韓3蛋，表現令人失望，賽後更出現新「話柄」。網上有圖片流出，顯示國足喺機場出發去南韓嗰陣，每個球員都推住7至8個大行李，據報呢個一直係國足出外比場嘅慣常情況，唔少球迷質疑佢哋咁做嘅原因。

過去曾有報道指，國足喺作客比賽經常「搬倉式」出行，試過託運657件行李令到包機延遲起飛；3年前國足喺世盃外輸波，亦被爆出帶住幾噸重行李返國，懷疑係裝當地特產同代購貨。亦有指國足球員會帶埋遊戲機、零食、保養品等等，甚至有球員帶埋全套茶具！所以唔少球迷批評國足球員帶咁多行李，似係去旅遊度假，多過去搏命比賽。

對於網上種種傳聞，國足周四(10日)晚發文澄清，公開佢哋今次東亞錦行李清單。代表團51人託運140件行李，包括84件個人行李，其他都屬於「必要物資」，例如醫療用品(營養品、治療床等)、訓練裝備(小龍門、人牆等)、衣物同科研分析器材等等。