【官宣】紐卡素簽入艾蘭加　打造瑞典「黑雙煞」鋒線

英超豪門紐卡素正式宣布簽入諾定咸森林翼鋒安東尼艾蘭加，轉會費達5,500萬鎊(約5.8億港元)，雙方簽約5年，呢位23歲瑞典國腳新一季將會夥拍同胞阿歷山大伊沙克，組成「黑雙煞」鋒線征戰歐聯等賽事。

安東尼艾蘭加轉投「喜鵲」一事已蘊釀多日，現時正式落實，佢簽約後，急不及待將身穿紐卡素波衫嘅相片放上社交網話：「我依家係紐卡素一員，好高興來到呢間偉大球會，最重要係我已經準備好接受新挑戰，希望盡快同大家見面，一齊出發。」艾蘭加亦不忘感謝諾定咸森林給予機會，效力兩年期間獲得巨大進步，佢2023年夏天由曼聯轉投森林後，上陣82場入11球及21次助攻。

紐卡素收購安東尼艾蘭加後，隊內已有3位瑞典國腳，另外兩位分別係前鋒阿歷山大伊沙克、後衞艾美卡夫。

另外，安東尼艾蘭加加盟紐卡素，曼聯亦可以獲得15%「二次轉會費」分紅，意味有825萬鎊(約8,740萬港元)進帳。值得一提，曼聯當時僅以1,500萬鎊將艾蘭加出售畀諾定咸森林，短短兩年，佢身價暴升超過3倍。