佐敦軒達臣重返英超 加盟賓福特
前利物浦隊長佐敦軒達臣闊別2年之後,將重返英超,根據「轉會權威」記者羅曼諾(Fabrizio Romano)爆料,呢位35歲中場已經同賓福特達成加盟協議,雙方將會簽約2年,好可能成為佢球員生涯最後一站。
佐敦軒達臣2023年夏天離開效力12年嘅利物浦,去沙特挖金加盟伊蒂法克,但僅半年就離隊,轉投荷甲勁旅阿積士,雙方早前同意提早解約。
佐敦軒達臣恢復自由身後,傳出多支球隊有興趣簽佢,包括取得英超席位嘅母會新特蘭、法甲球隊摩納哥,最終由賓福特勝出。呢位老將希望再戰英超之後,可以增加入選英格蘭國家隊機會,參加明年世界盃決賽周。
賓福特之所以迅速出手簽入佐敦軒達臣,主因係要填補離隊嘅基斯甸洛加特位置,呢位丹麥國腳日前已落實轉投阿仙奴。