干拿迪續約僵持　表態願投皇馬

利物浦今夏有阿歷山大阿諾特約滿轉投皇馬，另一守將伊巴希馬干拿迪嘅談判亦陷入停頓，據西班牙《馬卡報》報道，呢位法國國腳已表態願意加盟皇馬，利物浦為免「重蹈覆轍」或被逼放人。

伊巴希馬干拿迪同利物浦張合約明年完結，目前8萬鎊周薪嘅佢，希望大幅加薪到20萬鎊，配番佢依家球隊主力嘅「地位」，不過利物浦就唔願意作出咁大增幅，令轉會陷入僵持局面。

《馬卡報》報道，皇馬希望收購新中堅，對伊巴希馬干拿迪非常賞識，亦唔介意等到明年佢自由身轉會；干拿迪本身想留喺利物浦，但如果傾唔掂合約，佢亦唔抗拒今夏過檔皇馬。

利物浦為免阿歷山大阿諾特約滿走人事件重演，或會願意今夏提前拋售，轉會費約3,500萬鎊。