水晶宮新波衫宣傳　兩大主力去留露玄機

水晶宮日前為新球季波衫進行宣傳，盛傳獲利物浦斟介嘅中堅馬克古希，同禾頓等主力齊齊「領銜主演」，不過受阿仙奴挖角嘅伊比爾治伊斯就未見蹤影，令球迷揣測兩人去留前途。

馬克古希同水晶宮只剩1年合約，而且無意續約，據報利物浦已開出4,000萬鎊收購，但水晶宮似乎無意接受，今次仲搵埋呢位英格蘭國腳宣布新波衫，似乎留人態度強硬。

至於球隊另一核心伊比爾治伊斯，意外並無出現喺新波衫宣傳，據報佢合約內有6,800萬鎊買斷條款，阿仙奴正洽談收購，佢呢次缺席宣傳疑係一大玄機。

水晶宮周六(12日)周米禾爾踢咗場閉門熱身賽，馬克古希上陣45分鐘，但伊比爾治伊斯就冇份落場。水晶宮解釋上月有份踢國際賽嘅球員，包括伊比爾治伊斯等都會延遲歸隊，所以未有喺今場上陣。