發達啦！PSG車路士世冠盃獎金齊破1億美元大關

世冠盃決賽於周一(14日)凌晨3時舉行，車路士大戰巴黎聖日耳門(PSG)，無論勝負，雙方都已經賺到盤滿缽滿，今屆同樣已累積獲得超過1億美元(約7.8億港元)獎金，冠軍球隊將可以再增添多1,000萬美元收入。

今屆世冠盃總獎金達到10億美元，當中5.25億美元屬於「包底獎金」，所有參賽球隊都有份瓜分，但各隊數額唔同，最多係曼城有3,820萬美元，PSG亦有超過3,000萬美元。經過連場比賽及晉級後，PSG已累積近1.07億美元獎金排第1位，車路士有近1.05億美元，成為僅有兩支突破1億美元獎金嘅球隊。

PSG及車路士近年都因為大肆收購球員，多次被指違反公平財政條例，焗住以各種「財技」規避處罰，經過今屆世冠盃「吸金之旅」，有助舒緩財政壓力。