曼聯第3次報價　有信心周五簽入麥比奧莫

曼聯仍然未放棄收購賓福特前鋒麥比奧莫，根據英國《電訊報》爆料，紅魔鬼將會第3次提出報價，有信心打動賓福特放人，爭取周五(18日)或之前簽入呢位25歲喀麥隆國腳，以便備戰新球季。

曼聯上月初首次向賓福特開出總值5,500萬鎊轉會費求購麥比奧莫，但遭到拒絕，其後加碼至6,000萬鎊。不過，賓福特企硬要求6,500萬鎊(約6.9億港元)，並且絕大部分金額必須係固定轉會費，而非「離地」浮動轉會費，例如曼聯捧歐聯冠軍，先至有錢收。

至於曼聯第3次報價可能更接近6,500萬鎊，仍包含浮動轉會費，但會方準備放寬浮動轉會費條款，令賓福特更易獲得呢筆費用，希望對方接受報價。

「轉會權威」記者羅曼諾(Fabrizio Romano)指麥比奧莫仍然希望加盟曼聯，紅魔鬼未來幾日將盡最大努力爭取同賓福特達成交易協議。曼聯將於周六(19日)踢首場季前熱身賽對列斯聯，跟住拉隊去美國集訓，所以目標爭取周五(18日)前落實簽入麥比奧莫。