利物浦3比1贏普雷斯頓　施洛：做番自己

葡萄牙球星迪亞高祖達上月車禍離世後，利物浦周日(13日)進行首場比賽，作客以3比1擊敗普雷斯頓。賽事前有各種悼念祖達嘅儀式，達雲紐尼斯、加普入波後亦做出祖達以往嘅慶祝動作致敬，領隊施洛賽後表示，克服傷痛嘅最好方法就係「做番自己」。

今場熱身賽事前一度考慮取消，但最終如期上演，賽前有多個悼念祖達嘅儀式。利物浦上半場由干拿巴特利先開紀錄，達雲紐尼斯53分鐘再入1球，普雷斯頓83分鐘追番1球，但加普88分鐘建功，為利物浦鎖定3比1勝果。達雲紐尼斯同加普入波後，都做出Baby Shark同打機嘅動作，向祖達作最後致敬。

利物浦領隊施洛賽後表示：「經過祖達嘅事，睇落已經冇嘢係重要，但利物浦係一間球會，想唔想都好，都要練波同比賽。好難講乜嘢先係合適做法，我哋可唔可以練波？仲可唔可以笑？可唔可以嬲？我覺得最好嘅做法就係同祖達一樣，做番自己，想笑就笑、想喊就喊、想踢就踢。」