車路士威足4年！馬利斯卡：世冠盃更勝歐聯

全面改革後嘅世冠盃，首屆冠軍落入英超豪門車路士手上，佢哋唔單止有過億美元獎金收入，而且未來4年都可以着住印上「世界冠軍」標誌嘅波衫比賽，認真威水！

國際足協想將世冠盃打造成球會版嘅世盃，同樣係4年一度舉行，冠軍車路士有權喺波衫印上「世界冠軍」標誌，至少可以用4年，直到新嘅世冠盃冠軍出現為止。

車路士領隊馬利斯卡上年接任領隊，先贏歐協聯冠軍、再贏世冠盃冠軍，呢位意大利教頭表示奪冠成就，比贏歐聯有過之而無不及：「我認為世冠盃將會同歐聯一樣重要，甚至會重要過歐聯！我有幸喺3年前成為曼城贏歐聯一份子，但世冠盃雲集世界最好嘅球隊，所以我覺得今次捧盃嘅價值，比贏歐聯係有過之而無不及。」