頂替奧拿拿　曼聯筍價簽世冠盃龍門

曼聯門將奧拿拿近2季表現備受批評，近日開操又受傷面臨長達2個月養傷期，據巴西媒體報道，「紅魔鬼」有意收購保地花高門將約翰域陀，呢位29歲門將喺今屆世冠盃表現得到好評，曼聯準備啟動佢合約內600萬鎊買斷條款。

曼聯夏天同唔少門將傳出緋聞，達米安馬天尼斯、迪奧高哥斯達、辛尼拉文斯等都扯上過關係，可見曼聯對奧拿拿同比恩迪亞都冇乜信心，依家奧拿拿可能缺席季前熱身同開季，買龍門嘅急切性大大提升，600萬鎊平簽約翰域陀係高性價比嘅選擇。

約翰域陀經理人古迪利斯早前表示，英超係非常吸引目的地：「英超、德甲、葡超同其他地方球隊都對約翰域陀有興趣，佢嘅首選就係世界最佳聯賽英超，利物浦有艾利臣比加、曼城有艾達臣摩拉斯，兩個巴西門將都喺英超取得成功，約翰域陀都希望效法佢哋喺英超大展身手。」