一地花生！杜安薛比告曼聯醫療過失

前曼聯球員杜安薛比兩年前離隊，近日向法院提出法律訴訟，指控曼聯「醫療過失」，要求賠償。

27歲嘅杜安薛比係曼聯青訓產品，2015年已升上一隊，其間多次外借到阿士東維拉、拿玻里、史篤城，為曼聯累積上陣僅37場，終在2023年出售至葉士域治，並成為葉士域治升班功臣，最近佢轉投般尼，新球季再戰英超。

杜安薛比控告曼聯，涉及「醫療建議爭議」同「臨床過失」，據報杜安薛比首次嚴重受傷係2019年10月英超對利物浦，賽前熱身期間髋部受傷，同年12月英聯盃再度受傷，導致提前收咧。

之後一季，佢又因為足部受傷錯過季初賽事，到2022至23年球季再度長期缺陣，直至下半季先康復，被外借到史篤城。

杜安薛比效力曼聯期間經常受傷，但當轉投葉士域治，就回復健康，並成為球隊主力，唯一大傷係自己喺屋企洗碗時割傷，缺陣3場。

簡單嚟講，杜安薛比認為效力曼聯期間不停受傷，係因為曼聯所提供嘅醫療診斷同康復建議，存在專業疏漏，直接影響佢嘅職業生涯，所以要向母會提告。

原來曼聯同杜安薛比之前已經有過法律糾紛，去年11月，曼聯收到來自杜安薛比經理人索償要求，指曼聯要為2023年杜安薛比外借到史篤城交易，涉嫌違反足球經理人條例，要求補償。