耶馬奢靡生日P爆醜聞 女嘉賓上圍有「指定要求」
被譽為「新球王」嘅拉明耶馬，周日(13日)正式步入18歲，呢位巴塞隆拿天之驕子亦高調慶祝，舉行一個有超過200人參加嘅奢靡生日派對。不過呢次派對就爆出連環醜聞，有Model踢爆出席嘅女嘉賓，胸部尺寸有「指定要求」，而且耶馬仲聘請侏儒症患者做表演，引嚟社會團體炮轟兼起訴，要求西班牙政府徹查。
西班牙球星耶馬少年得志，5月份同巴塞續長約兼繼承10號波衫，正式做「美斯接班人」，不過耶馬同美斯嘅低調作風完全相反，18歲生日即舉行盛大派對，耶馬亦喺社交網發布剪輯過嘅派對影片，用「黑手黨風格」呈現派對嘅衣香鬢影，有賭場遊戲畀人賭錢、又有性感美女熱舞，報道指派對賓客超過200人。
不過，今次派對就爆出唔少爭議，著名模特兒Claudio Calvo爆料，指耶馬以每人2萬歐元酬勞，聘請12名「指定胸部尺寸」、「指定頭髮顏色」嘅Model做嘉賓，而且要24小時On Call。上圍豐滿嘅Claudio亦係獲邀出席嘅人之一，但佢收到耶馬提出嘅要求，同埋被通知需要穿著嘅衣物之後，即時就拒絕邀請。
更嚴重嘅係，耶馬喺派對內亦聘請侏儒症患者做表演，引起極大回響，殘疾人權益組織ADEE發聲明炮轟：「喺21世紀仲有人將侏儒症患者作為私人派嘅娛樂表演，實在不能接受，而且仲係耶馬呢啲公眾人物去做，情況更加嚴重。西班牙法例禁止呢個行為，我哋關心係咪有錢有權嘅人，就唔需要受到懲罰。」
據報ADFF已經要求西班牙政府進行徹查，睇下侏儒症患者喺派對內做點樣嘅表演，如果發現有違法行為，耶馬可能面臨高達86.7萬鎊罰款。耶馬將會同巴塞展開新球季備戰，下星期會飛日本同南韓踢熱身賽，對神戶勝利船同FC首爾。