彭馬、占士解釋「特朗普事件」　呢個球員更唔畀面

車路士贏得世冠盃冠軍後，美國總統特朗普喺頒獎後「搶戲」事件，成為網上熱話，當時面露不悅嘅高爾彭馬同隊長列斯占士，事後解釋番當時情況，證實特朗普確特「唔想走」。

特朗普負責為冠軍球隊頒獎，原本頒完獎後應該離開舞台，畀車路士球員舉盃慶祝，但佢就選擇繼續企喺正中間「齊歡暢、同慶賀」。高爾彭馬被影到同隊友講：「佢喺度做乜嘢？」

高爾彭馬事後受訪表示：「我知道特朗普會喺度，但我冇諗過連埋捧盃嗰刻佢都留喺個台，所以真係有啲困惑。」隊長列斯占士就話：「大會同我講，話特朗普會嚟頒獎，之後就離開，所以我當時以為佢會走，但係佢話想留喺度。」

雖然高爾彭馬嘅行為有啲「唔畀面」，不過最唔畀面特朗普嘅車路士球員，其實係19歲小將泰列基佐治，佢喺頒發獎牌儀式嗰陣，係唯一一個唔同特朗普握手嘅球員，而係直接跳過特朗普，同身邊嘅美國班主保利握手。