紐卡素狂「增鋒」　破球會紀錄天價搶購德甲射手

紐卡素繼日前以5,500萬鎊轉會費簽入諾定咸森林翼鋒安東尼艾蘭加之後，又再出手買前鋒，根據英國《太陽報》爆料，「喜鵲」提出以破球會紀錄嘅6,950萬鎊(約7.3億港元)，收購法蘭克福射手伊基迪基，打造夢幻鋒線。

法蘭克福上年2月初向巴黎聖日耳門借用伊基迪基，由於呢位23歲法國新星表現出色，隨後會方以1,650萬歐元(約1.5億港元)買斷佢。伊基迪基愈戰愈勇，上季上陣48次入22球及12次助攻，因而獲得多間球會垂青，據悉法蘭克福已經拒一份6,000萬鎊報價。

紐卡素有見及此，今次開出6,950萬鎊，希望打動法蘭克福放人，如果成事，伊基迪基將成為「喜鵲」史上最高身價球員，打破3年前用6,800萬鎊向皇家蘇斯達收購阿歷山大伊沙克嘅紀錄。

伊基迪基仍有4年合約在身，毀約金達到8,600萬鎊，法蘭克福可以吊高來賣，紐卡素想簽入呢位猛將，隨時需要加碼。不過，英國傳媒認為伊基迪基同阿歷山大伊沙克踢法相似，位置有所重疊，令質疑收購是否明智，亦有分析指阿歷山大伊沙克獲得阿仙奴等球會垂青，紐卡素計劃收購伊基迪基，可能係為伊沙克離隊做準備。