皇馬將帥三角暗戰　雲尼斯奧斯拒續約威脅自由身走人

西甲豪門皇家馬德里爆出將帥「三角暗戰」，根據西班牙媒體《okdiario》獨家消息，翼鋒雲尼斯奧斯祖利亞不滿新教練沙比阿朗素戰術安排及「偏心」隊友基利安麥巴比，呢位25歲巴西國腳認為自己地位受威脅，決定改變主意，暫停續約談判，甚至唔排除等2年後約滿自由身離隊，令「銀河艦隊」面臨損失2億歐元(約18億港元)潛在轉會費收入。

雲尼斯奧斯祖利亞將於2027年6月約滿，上季曾經口頭答應續約至2030年，但新帥沙比阿朗素上月接手領軍後，情況出現變化，《okdiario》指「小雲」決定唔續約住，導火線係早前世冠盃4強皇馬對巴黎聖日耳門(PSG)，由於阿歷山大阿諾特受傷，沙比阿朗素安排司職左翼嘅雲尼斯奧斯轉踢右翼，平衡右路側擊力，令「小雲」非常不滿，因為佢一早講明唔識踢右翼，但沙比堅持要佢出任呢個位置，最終皇馬慘敗0比4，雲尼斯奧斯踢咗64分鐘就被換走，令兩人關係愈來愈緊張。

除咗戰術問題之外，據悉雲尼斯奧斯一直唔滿意人工低過基利安麥巴比及對方擁有「特權」，尤其是沙比阿朗素執教後，傾向以「麥總」作為核心，「小雲」擔心地位不保，甚至可能重演世冠盃一幕，將左翼位置讓畀麥巴比，因此以暫停續約談判作為無聲抗議。

事實上，麥巴比上年加盟皇馬後，已傳出雲尼斯奧斯同佢不和，皆因兩人最擅長踢左翼，甚至同樣鍾情7號球衣，即使屬於隊友，但存在競爭關係，隨住沙比阿朗素成為新帥，「麥總」地位可能佔優，「小雲」必須作出回應。

網民趁機抽水，指皇馬終於有「報應」，因為會方近年頻頻向其他豪門挖角，免轉會費簽入球星，包括上月從利物浦手上搶走阿歷山大阿諾特，最轟動係上年夏天簽入麥巴比，令呢位法國國腳同PSG反目成仇。身價達2億歐元嘅雲尼斯奧斯現時拒續約，「銀河艦隊」面臨一嘗人財兩失滋味。