拿玻里取消收購紐尼斯　皆因有「新歡」

拿玻里原本提出收購利物浦前鋒達雲紐尼斯，但根據「轉會權威」記者羅曼諾(Fabrizio Romano)最新消息，呢支意甲冠軍已經通知紅軍，取消有關交易。拿玻里亦有「B計劃」，將會簽入烏甸尼斯前鋒羅倫素盧卡。

拿玻里曾經出價5,500萬歐元收購達雲紐尼斯，但利物浦要求起碼6,500萬歐元(約5.9億港元)，令談判陷入僵局，隨住季前備戰工作即將展開，拿玻里會方決定放棄簽入呢位26歲烏拉圭國腳，改為收購羅倫素盧卡。

現年24歲嘅羅倫素盧卡唔只比達雲紐尼斯年輕，最重要係身價平一大截，估計只需要3,500萬歐元(約3.2億港元)就可以將呢位意大利國腳收歸旗下。身高達2米嘅羅倫素盧卡屬於典型「空中霸王」，上季為烏甸尼斯上陣36場入14球及2次助攻，入波數字同拿玻里主力射手盧卡古一樣。