麥比奧莫成「魔」受阻　曼聯考慮改簽積遜

曼聯第3次報價求購賓福特前鋒麥比奧莫，仍然未能成功，根據英國《太陽報》爆料，紅魔鬼主帥魯賓艾摩廉已失去耐性，考慮改為招攬車路士射手尼高拉斯積遜。

據悉曼聯原本希望周五(18日)前簽入麥比奧莫，但賓福特企硬要求起碼6,500萬鎊固定轉會費，唔接受浮動轉會費條款，導致傾唔掂數。最新消息指麥比奧莫已返回賓福特操練，備戰新球季，似乎已打定輸數留隊。

曼聯亦有兩手準備，計劃收購尼高拉斯積遜，由於車仔今夏已簽入2位前鋒利安戴納、祖奧柏度，近日傳出有意出售尼高拉斯積遜。雖然車仔認為呢位24歲塞內加爾國腳身價值1億鎊(約10.5億港元)，但估計5,000萬鎊就可以成交，平過麥比奧莫。

尼高拉斯積遜上季為車路士上陣37場入13球及6次助攻，但經常浪費入波機會為人詬病，就算曼聯簽到佢，恐怕未必有大作用。