【官宣】巴塞續約耶馬6年　舉行「10號加冕」儀式

西甲冠軍巴塞隆拿，周四(17日)為18歲嘅拉明耶馬舉行「10號加冕」儀式，正式同呢位「新球王」續約6年。巴塞件10號波衫曾經由美斯、朗拿甸奴、李華度、羅馬里奧同馬納當拿等傳奇擁有，今次由耶馬繼承，呢位新星豪言會為巴塞帶來長期勝利。

耶馬同巴塞早已傾好續約條款，但條例上要等佢18歲生日(7月13日)後先可以正式簽約，巴塞周四就舉行盛大儀式，球會所有高層、以及耶馬父母親友都全部出席。巴塞會長拉波塔同耶馬簽字後，隨即去到巴塞旗艦商店，由耶馬親手印製10號波衫。

同時，巴塞宣布喺耶馬家鄉馬塔羅打造「耶馬牆」，由多位藝術家製作耶馬成長故事為主題嘅Graffiti，致敬佢由7歲加入巴塞青訓，到依家繼承傳奇10號球衣嘅經歷。耶馬至22年打入一隊後，先後着過41號、27號同19號，新球季就會着起標誌10號。

耶馬表示：「好感激巴塞畀件10號我，細細個我就夢想着呢個號碼，美斯、朗拿甸奴、馬納當拿都係足球傳奇，希望我可以延續佢哋嘅傳奇。我唔會覺得有壓力，美斯有佢嘅傳奇之路，我會行自己嘅路，我深信喺巴塞會長期獲得勝利，世盃冠軍同歐聯冠軍係我最大目標。」

另外，耶馬日前喺18歲生日派對被指控僱用侏儒症患者表演，正受西班牙政府調查，舉行奢華派對亦受到質疑，不過耶馬就回應：「我專注為巴塞踢波，但離開訓練場，我會享受自己生活。老實講，無8論係讚揚家批評，唔係嚟自我家人同親友嘅聲音，我都唔會在乎。」

巴塞近代10號球員

拉明耶馬(西班牙) 2025 -

安素法迪(西班牙) 2021 - 2025

美斯(阿根廷) 2008 - 2021

朗拿甸奴(巴西) 2003 - 2008

列基美(阿根廷) 2002 - 2003

李華度(巴西) 2000 - 2002

列馬倫(芬蘭) 1999 - 2000

基奧雲尼(巴西) 1996 - 1999