「空中霸王」絕殺！意大利女足相隔28年闖4強
周四(17日)凌晨女子歐國盃8強，意大利女足憑「空中霸王」姬列妮喺90分鐘頭槌絕殺，2比1擊敗挪威女足，相隔28年後再次闖入女子歐國盃4強，將會同英格蘭女足或瑞典女足爭入決賽。
兩隊上半場踢得謹慎，埋門鏡頭唔多，不過下半場發力令戰情緊張，姬列妮50分鐘近門射入為意大利領先；挪威嘅希嘉寶10分鐘後博到12碼，但佢親自操刀宴客，亦係佢今屆第2次射失12碼。
希嘉寶6分鐘後將功贖罪射入追平1球，之後戰況出現膠着，直到90分鐘意大利左路傳中，姬列妮走遠柱接應頂入，帶領意大利女足自1997年後，再次殺入女子歐國盃4強。
35歲嘅姬列妮過去1年表現勇猛，上季為祖雲達斯女足入19球成意甲金靴，亦係上季歐洲5大女子聯賽頭槌入波最多球員，已為意大利入60球嘅佢賽後表示：「夢想成真！由集訓開始，我喺隊友眼入面已經見到呢隊波好特別，能夠成為歐洲最好嘅4支球隊，我覺得好滿足。」