利物浦辣招施壓！唔賣伊沙克就截你胡！

利物浦收購前鋒計劃火速開動，據報開出破英超紀錄嘅1.2億鎊，收購紐卡素前鋒阿歷山大伊沙克，可惜「喜鵲」目前不為所動。估唔到利物浦再出辣招，表示如果紐卡素拒絕放人，就會改斟紐卡素收購目標伊基迪基，「紅軍」更已同法蘭克福進行接觸，令紐卡素陷入進退兩難局面。

紐卡素早前收購安東尼艾蘭加後，全力斟介法國前鋒伊基迪基，首次開價7,000萬鎊被法蘭克福拒絕，該德甲球會要求8,600萬鎊轉會費，談判仍然持續。利物浦近日突然出招，開出1.2億鎊天價斟介伊沙克，但紐卡素一直強調伊沙克係「非賣品」，而且身價至少1.5億鎊，無意放人。

估唔到利物浦仲有後着，就係如果紐卡素拒賣伊沙克，「紅軍」就會截劫伊基迪基，轉會權威羅曼諾爆料：「利物浦同紐卡素就破紀錄轉會費簽伊沙克進行商討，如果紐卡素唔賣，利物浦就會加入爭奪伊基迪基，決定權依家喺紐卡素手上。」