祖達之痛　球壇悲劇影響深遠

利物浦經歷「祖達之痛」，雖然首場熱身賽贏波而回，但仍然為新球季帶來不明朗因素。以往球壇都曾經發生唔少悲劇，對球員、球隊甚至球壇發展，帶來深遠影響。

【慕尼黑空難曼聯歷劫後更堅強】

1958年2月6日，曼聯領隊畢樹比爵士帶領年輕球員，喺歐冠盃8強作客貝爾格萊德紅星踢成3比3，總比數以5比4進身準決賽，但喺趕返英格蘭踢足總盃途中，飛機於慕尼黑加油後再起飛，經2次起飛失敗後，第3次喺鋪滿冰雪嘅跑道失事，機上44人當中，有8名曼聯球員、3名職員及8名隨行體育記者罹難。

畢樹比爵士亦身受重傷，副領隊占美梅菲帶住青年軍及其他球會借將（包括利物浦及列斯聯），勉強完成球季，聯賽成績一落千丈，但仍然打入足總盃決賽，惜以0比2落敗。之後畢樹比爵士帶住卜比查爾頓等幸存者，加上新加盟嘅丹尼士羅及佐治貝斯等，經過7年重奪聯賽冠軍，更於慕尼黑空難10年後嘅1968年擊敗賓菲加，終於一嘗歐洲冠軍滋味。

慕尼黑空難成為曼聯歷史及文化重要部分，塑造球會「永不放棄」嘅精神，有分析更認為，空難嘅記憶強化球迷對球會嘅忠誠，形成深厚嘅聯繫。1999年曼聯戲刻性反勝拜仁慕尼黑贏歐聯，係「紅魔鬼」自1968年後再捧走大耳朵盃，無巧不成話，當日5月26日，正正係畢樹比爵士嘅90歲生忌。

【科爾心臟病發印證賽程過密】

前曼城中場科爾喺2003年6月洲際國家盃4強，為喀麥隆出戰哥倫比亞，踢到72分鐘，冇受到碰撞情況下，突然倒地昏迷，即使醫護人員立即為佢進行急救，但最終仍然不治，終年28歲，震驚球壇，事後證實佢死於隱性心臟病。

當時科爾媽媽怒斥賽程太頻密係害死科爾嘅「真兇」，令時任國際足協會長白禮達無言以對，各界亦開始反思現代足球過分追求商業利益，令球員疲於奔命嘅問題，唔少反對「金元足球」人士往往拎科爾作為例子，要求各地賽會作出改革，減輕球員負擔。

不過，巨額金錢誘因之下，國際足協及歐洲足協並冇吸取教訓，反而變本加厲，不斷增加賽事，即使唔少教練、球員經常投訴「地獄賽程」，當局仍然懶理。

【希爾斯堡慘劇紅軍元氣大傷】

利物浦嘅歷史同「慘案」經常掛鈎，1989年4月15日喺英國發生「希爾斯堡慘劇」（圖），就係英國體育史上最慘烈事故之一，事件造成97名利物浦球迷喪命。原本處於黃金時代嘅利物浦，短時間內接連經歷希素球場慘劇（1985年）同希爾斯堡慘劇，間接令球隊步向低谷，慘歷長達30年嘅頂級聯賽無冠歲月。

當年英足盃4強喺希爾斯堡球場上演，由利物浦對諾定咸森林，意外成因眾說紛紜，最初廣傳係球迷生事，大批球迷湧入本身已經逼爆嘅中央看台，而且當時球場以鐵絲網分隔場區，令人流無路可走，結果出現人踩人慘劇。近年有新調查報告出現，舉證警方控制不力先至係慘劇出現主因。

利物浦喺80年代盛極一時，10年內6次贏得英甲（頂級聯賽）冠軍，但喺希爾斯堡慘劇發生後，雖然利物浦喺1989/90球季再贏聯賽冠軍，但元氣大傷嘅「紅軍」之後無以為繼，球迷等足30年，直到2020年先至嘗到英超冠軍滋味。

【佩亞達猝逝賽會規定要設除顫器】

2007年8月西甲發生震驚球壇事件，喺西維爾對基達菲嘅聯賽，曾入選西班牙國家隊嘅後衞佩亞達，因為突發心臟病暈倒球場，雖然佢曾經恢復知覺，但之後返更衣室再次暈倒，送去深切治療病房搶救，3日後宣告不治，終年22歲。

佩亞達離世前，先後幫西維爾連贏2屆歐洲足協盃冠軍（歐霸盃前身），係西維爾成為「歐霸之王」嘅開國功臣。西維爾喺佩亞達去世後冇耐，就喺歐超盃輸畀AC米蘭。直到2014年，西維爾再次贏得歐霸盃，一眾球員亦齊齊着起紀念佩亞達嘅T恤致敬，西維爾球迷亦以「佩亞達精神」，形容球隊永不放棄嘅信念。

自從佩亞達慘劇發生後，西班牙足總立例所有賽事都要安排自動心臟除顫器，以防止同類事件再次出現，後來亦有球員喺球場上出現心臟問題，好在有足夠設備救番條命。

【查基事件令球會加強體檢】

2009年8月，當時啱啱榮升愛斯賓奴隊長嘅中堅查基，隨隊去意大利作季前集訓，訓練完後未有出席聚餐，其後發現佢因心臟病發倒臥喺自己房間，搶救無效，終年26歲。

事件震驚全西班牙，當中死黨兼西班牙中場核心恩尼斯達，更加接受唔到，證實患上抑鬱症，需要心理輔導先至有好轉，1年後世盃決賽對住荷蘭，恩尼斯達加時轟入奠勝士哥，為西班牙首度封王，佢入波後立即扯高波衫，騷出「查基永遠與我們同在」嘅字句（圖），感動全球，事後「小白」坦言，嗰刻先令佢慢慢釋懷。

查基猝死，再次引發對球員健康、尤其係心臟健康問題嘅關注，同以往對新加盟球員先有較為詳細嘅身體檢查唔同，好多球隊都加強對球員嘅體檢，定期做檢查，期望盡早發現潛在健康問題，預防悲劇再發生。

【查比高恩斯空難幸存者領軍升班】

巴西球隊查比高恩斯2016年空難，係足壇近年一大悲劇，幾年後空難幸存者之一阿倫路舒曹，以隊長身份奪得巴乙冠軍升班，感動全世界。

71罹難僅6人生還

災難發生於2016年11月28日，查比高恩斯乘塔航班出戰南美球會盃決賽，途中不幸喺哥倫比亞麥德林附近墜毀，機上大部分球員、職員及隨行記者共71人死亡，有6人生還，包括3名球員，其中只有阿倫路舒曹繼續足球生涯，門將科曼需要截肢，中堅尼圖亦再冇披甲。

空難之後，巴西政府宣布哀悼3日，查比高恩斯被追授該屆南美球會盃冠軍，球隊會章上增添1大1小兩顆星星，大星代表獲追授嘅南美球會盃冠軍，小星代表空難中離世球員。