全部都要！祖記可能簽晒辛祖福仔

祖雲達斯斟介查頓辛祖已到埋尾階段，辛祖已答應減薪加盟，同曼聯嘅轉會費談判亦接近成交，據報原來祖記增兵意向當中，拉舒福特都包括在內，只要報價滿足到曼聯，佢兩兄弟就會齊齊過檔祖記。

先講查頓辛祖轉會情況，辛祖已答應大幅減薪，雙方達成個人協議，而祖記同曼聯嘅轉會費談判，祖記最新報價為1,750萬歐元(約1.59億港元)，意大利傳媒報道，曼聯已接納此報價，不過仲有手尾，就係辛祖要求500萬至600萬歐元「遣散費」，曼聯希望呢筆費用同祖雲達斯共同承擔，等緊祖記回應。

至於拉舒福特，佢同巴塞隆拿嘅斟介仍在吹水階段，反而祖雲達斯買入辛祖後，原來仲打算買埋拉舒福特。拉舒福特已被納入祖記增援意向，不過收購過程較複雜，祖記要先將尼高拉斯干沙利斯出售，然後再評估收購拉舒福特可行性，曼聯對其標價為4,000萬鎊(約4.2億港元)。