坦哈格脫「魔」首仗遭遇恥辱性慘敗　一句回應令人嘩然

前曼聯主帥坦哈格成為利華古遜教練後，領軍第1場比賽就遭遇沉重打擊，喺周六(19日)凌晨季前熱身賽以1比5慘敗於法林明高U20青年軍腳下，堪稱奇恥大辱。賽後呢位荷蘭名帥保持「記者會不敗」風格，聲稱唔在乎熱身賽賽果，最重要係球員冇受傷。

坦哈格上年10月底被曼聯解僱後，等到今年5月底搵到新工，接替沙比阿朗素，執掌利華古遜帥印。呢位「光頭名帥」選擇拉隊去巴西備戰新球季，首場熱身賽約戰法林明高U20，英國《太陽報》指有博彩公司開出利華古遜1.01倍客W，可見雙方實力理應相距懸殊。

點知開賽後，戰情出人意表，法林明高U20僅用2分鐘就入波打開紀錄，利華古遜試圖加強進攻，反而令防線暴露更多空位，被對手予取予攜，上半場已落後4球。踢到54分鐘，利華古遜更加落後0比5，直至去到70分鐘入波破蛋。

賽後坦哈格接受傳媒訪問時話：「比數方面的確非常差，我哋唔應該輸，更加唔應該輸咁多，但我唔在乎熱身賽賽果，最重要係球員冇受傷。」事實上，賽前坦哈格已「戴頭盔」話利華古遜球員剛歸隊冇耐，狀態肯定唔及正處於季中賽事嘅法林明高U20。

此外，利華古遜今夏有3位主力科利安華迪斯、謝利美費林邦、莊拿芬泰希離隊，亦削弱整體實力。經此一役後，坦哈格可能加快增兵，盛傳佢希望簽入2位曼聯舊部安東尼馬菲奧斯、阿歷真度加拿祖。