西班牙「讓兩球12碼」照贏波　晉級4強

周六(19日)凌晨女子歐國盃8強，爭標熱門西班牙女足即使有2位球員比賽中射失12碼，但仍然以2比0擊敗主辦國瑞士女足，今屆保持4戰4勝，繼1997年之後，第2次晉級4強。

西班牙女足延續捧上屆女子世界盃冠軍強勢，今屆女子歐國盃3場分組賽都贏波，來到8強淘汰賽一樣展現霸氣，強攻瑞士女足。開賽9分鐘，「女狂牛」獲得12碼，但係中場卡丹堤射斜出界。

其後戰情陷入膠着，踢到66分鐘先至打破僵局，西班牙女足憑前鋒迪卡絲迪露入波領先，僅過5分鐘，比娜為「女狂牛」射成2比0，就算比賽末段，主將佩泰娜絲射失12碼，都無礙球隊晉級4強，打破過去3屆8強止步嘅宿命。

至於瑞士女足輸波之外，仲有後衞瑪莉茲補時領紅牌被逐，西班牙女足將於4強同法國女足對德國女足嘅勝方爭入決賽。