【官宣】馬度基同阿仙奴簽約5年　但無緣訪港

阿仙奴正式宣布簽入車路士翼鋒馬度基，雙方簽約至2030年6月，據悉轉會費為5,200萬鎊(約5.47億港元)。由於呢位23歲英格蘭國腳剛於早前為車仔踢完世冠盃，獲准放假延遲歸隊，冇份參加亞洲之旅季前熱身賽，同香港球迷緣慳一面。

阿仙奴收購馬度基一事，已經醞釀一段日子，即使早前有超過5,000位兵工廠球迷聯署反對呢單交易，但會方仍然力排眾議，正式落實簽入呢位翼鋒，佢獲得20號球衣。

馬度基上季為車路士上陣41場入11球及4次助攻，數據並非特別亮麗，但阿仙奴主帥阿迪達非常欣賞佢嘅盤扭突破能力，認為可以為隊友創造更大進攻空間，同時減輕另1位翼鋒布卡約沙卡嘅負擔。

馬度基成為阿仙奴今夏第4位新兵，另外3位分別係門將阿列沙巴拿加、中場蘇比文迪、基斯甸洛加特。英國《太陽報》指馬度基繼續放假休息，唔會隨隊參加亞洲之旅，包括7月31日啟德體育園主場館舉行，阿仙奴對熱刺都唔使預佢，估計馬度基最快要等到下月「酋長盃」先至會為阿仙奴上陣。