森林想簽辛祖　複製艾蘭加勵志故事

諾定咸森林早前將安東尼艾蘭加出售畀紐卡素後，需要補充翼鋒人腳，並睇中遭曼聯「掛牌」待售嘅查頓辛祖，似乎想複製當年艾蘭加脫「魔」加盟森林嘅成功勵志故事。

諾定咸森林2年前僅用1,500萬鎊向曼聯收購安東尼艾蘭加，呢位瑞典國腳表現出色，早前以5,500萬鎊轉投紐卡素，令森林大賺一筆，所以今次又想向紅魔鬼球員埋手，希望簽入同樣位置嘅查頓辛祖。

事實上，查頓辛祖被曼聯外借去多蒙特及車路士期間，都有不俗表現，森林方面認為佢仍然具級數，能夠為球隊作出貢獻，甚至乎將來「重生」，又可以高價出售。

盛傳意甲勁旅祖雲達斯都計劃簽入查頓辛祖，但只願意支付1,500萬鎊轉會費，曼聯要求2,500萬鎊(約2.6億港元)，令交易遲遲未能成事，森林可以乘虛而入。