【官宣】PSG簽天才門將　預示當拿隆馬走人？

法甲兼歐聯冠軍巴黎聖日耳門(PSG)宣布簽入羅馬門將連拿度馬連，同呢位19歲新星簽約至2030年6月，由於正選門將基安盧基當拿隆馬仍未續約，PSG簽入連拿度馬連，可能作為呢位意大利國腳嘅接班人。

身高1米90嘅連拿度馬連本身喺巴西出世，曾於聖保羅受訓，5年前跟隨家人移居意大利，並加入羅馬青年軍，其後選擇代表意大利U19小國腳比賽。

連拿度馬連上年9月首次升上羅馬一隊，但欠缺上陣機會，今年2月決定拒絕續約，等今夏自由身離隊，現時正式加盟PSG登入豪門，可見佢潛質非常優厚。

與此同時，基安盧基當拿隆馬只剩下1年合約，盛傳佢準備明夏自由身離隊，可能加盟國際米蘭，一旦成真，連拿度馬連就有望趁機上位。