巴塞傾掂借用拉舒福特　打臉舒寧咸

據歐洲各大傳媒報道，曼聯同巴塞隆拿就拉舒福特轉會達成協議，「福仔」新一季將以借用身份加盟巴塞，實現佢一直以來嘅夢想。曼聯名宿舒寧咸日前公開批評拉舒福特，話佢唔配有「升呢」踢巴塞嘅機會，依家慘被打臉。

轉會權威羅曼諾爆料：「拉舒福特去巴塞，Here We Go！各方面已達成口頭協議，巴塞安排拉舒福特未來幾日做體測，借用性質，巴塞有權選擇買斷，等細節落實就可以飛去西班牙。」據報巴塞將全數負責「福仔」32.5萬鎊周薪，令曼聯明年慳番1,500萬鎊人工開支，係曼聯同意外借嘅最大原因。

拉舒福特今年初已經渴望加盟巴塞，但最終外借去維拉，巴塞今夏本來另有目標，可惜收購尼高拉斯威廉斯、路易斯迪亞斯都失敗，終於決定斟拉舒福特。舒寧咸日前公開炮轟拉舒福特：「年輕人以成為頂級球員同效力曼聯為夢想，拉舒福特應該感恩，冇理由咁樣放棄嗌走，由曼聯轉會巴塞，係佢唔配擁有嘅『升呢』，我希望佢得唔到佢渴望嘅轉會。」