德國門將勇救兩球12碼　踢少1人驚險晉級4強

周日(20日)凌晨女子歐國盃8強壓軸之戰，上屆亞軍德國女足開波13分鐘就踢少1人，逼和法國女足1比1，需要互射12碼分勝負，「德女」門將安卡蓮貝嘉扮演救世主角色，撲出兩球12碼，兼自己射入1球，協助德國女足贏6比5晉級4強，將會同西班牙女足爭入決賽。

德國女足中堅卡芙蓮軒迪歷喺禁區內扯對手頭髮，被球證直接出示紅牌趕出場及判罰12碼，法國女足由姬絲基約蘿主射入網打開紀錄。「德女」身為女子歐國盃史上捧盃次數最多嘅球隊，不甘示弱，踢到25分鐘憑絲祖伊姬紐絲堅頂入角球扳平。

換邊之後，雙方各錯過1次黃金機會，「法女」姬絲基約蘿入波被判無效，「德女」有絲祖伊姬紐絲堅射失12碼。法定時間打和1比1，加時冇紀錄，需要互射12碼分勝負，成為34歲「德女」門將安卡蓮貝嘉表演時間，撲出兩球12碼之外，自己都射入1球，成為晉級大功臣，並當選今場最佳球員。

今屆4強全部誕生，上屆冠軍英格蘭女足對意大利女足，德國女足對西班牙女足。