利物浦再施銀彈　扑錘近1億歐元簽伊基迪基

近年被批評「孤寒」嘅利物浦，今個夏天轉性狂施銀彈，繼破紀錄1.27億鎊(約1.5億歐元)收購科利安華迪斯後，周六(19日)又同法蘭克福達成協議，將用接近1億歐元收購法國前鋒伊基迪基，雙方將會簽約6年。

轉會消息「大神」David Ornstein報道：「利物浦同法蘭克福已就伊基迪基轉會達成框架協議，距離落實仲有程序要跟，預計日內完成，如果所有獎金條款啟動，轉會費總值會打破法蘭克福9,500萬歐元嘅賣人紀錄。」英國傳媒透露，利物浦會先支付9,000萬歐元，另有500萬歐元以上嘅獎金條款。

利物浦希望能夠喺出發亞洲之前完成交易，令伊基迪基可以隨隊東訪。現年23歲嘅伊基迪基上季為法蘭克福喺德甲上陣33場入15球，係佢出道後最多產一季，踢法被指有法國名將亨利嘅影子。