有大志！阿密特迪亞路定曼聯新季目標係......

曼聯上季「四大皆空」，英超更淪落到排第15位，新球季緣盡歐洲賽，今個夏天佢哋志切重建，新星阿密特迪亞路近日受訪，為新球季定立目標，表示如果曼聯可以殺入「英超前5」，就算係成功球季。

23歲嘅迪亞路展望新球季：「聯賽前5會係一個好嘅球季，希望到季尾我哋可以入前5名，因為我哋值得擁有。球迷需要有耐性，我哋有新領隊、新球員、新戰術，上季確實成績唔好，但我深信今季會贏好多波，喺季尾會有好多美好事情出現。」

曼聯上季排第15位，如果新球季可以進入前5，代表曼聯要爬升超過10名，不過亦有球迷指出，英超第5名唔一定會有歐聯參賽資格，迪亞路嘅「好球季」定義仍嫌保守。曼聯今夏簽入巴西前鋒馬菲奧斯根夏，翼鋒麥比奧莫亦即將來投。