阿特蘭大斟基艾沙　利物浦願負擔部分人工

根據意大利傳媒爆料，阿特蘭大計劃以1,200萬歐元(約1.1億港元)收購利物浦翼鋒費達歷高基艾沙，紅軍為盡快促成交易，甚至願意負擔部分薪酬，名副其實半賣半送。

阿特蘭大已經將首席射手列迪古出售畀沙特阿拉伯豪門艾卡迪沙，加上另1位鋒線主力盧卡文亦好大機會離隊，急需要補充進攻球員，於是向費達歷高基艾沙埋手。呢位27歲意大利國腳上年夏天以1,000萬歐元轉會費由祖雲達斯加盟利物浦後，由於受傷患問題困擾，長期缺乏狀態，僅上陣14場入2球及2次助攻，紅軍主帥施洛早已打算放走基艾沙，既然阿特蘭大想簽佢，當然要把握機會出貨。

據悉阿特蘭大仍然需要評估費達歷高基艾沙健康狀況，擔心佢加盟之後又會長抖，利物浦方面希望盡快送走呢位「玻璃腳」，願意負擔部分薪酬，估計費達歷高基艾沙好大機會重返意甲搵食。