【有片】邦瑪迪醒目入波 西班牙首闖女歐國盃決賽
女子歐國盃決賽戲碼出爐，大熱門西班牙女足將同衞冕嘅英格蘭女足爭冠。周四(24日)凌晨4強大戰，西班牙憑2屆金球獎得主邦瑪迪入波，喺加時戰1比0險勝德國女足，帶領「女狂牛」史上首次殺入女子歐國盃決賽。
德國今場殘陣出擊，不過表現並唔失禮，法定時間同西班牙打成0比0平手。加時戰西班牙畢竟技高一籌，踢到113分鐘，邦瑪迪接應隊友直線巧妙轉身，超窄角度抽射近柱入網，助西班牙贏1比0入決賽。西班牙歷來喺女子歐國盃最好成績，只係1997年拎季軍。
邦瑪迪喺決賽周前5日因腦膜炎入院，康復後逐步搵番狀態，今場係佢連續第2場拎賽事MVP，邦瑪迪賽後表示：「我有研究過德國門將企位，知道佢有時會放棄近柱，當時佢指示隊友守中間，我就決定直接射門。我覺得好光榮，因為西班牙值得入決賽。」