伊基迪基投利物浦　法蘭克福賣前鋒袋4億歐元

利物浦周四(24日)宣布，法國前鋒伊基迪基由法蘭克福加盟，據報轉會費總值高達9,100萬歐元。今次轉會真正大贏家，其實係法蘭克福，統計顯示呢支德甲勁旅，近6年單靠賣前鋒就袋走接近4億歐元，認真犀利。

23歲嘅伊基迪基上季喺德國上位後，即獲利物浦垂青，以8,000萬歐元轉會費，外加約1,100萬歐元獎金條款完成收購，佢簽約後已起程飛香港會合大軍，有望參加周六(26日)對AC米蘭嘅熱身賽，而伊基迪基嘅球衣號碼暫時仍未公布。

法蘭克福賣伊基迪基大賺一筆，呢間德甲球會近年不斷向豪門輸出星級前鋒，包括上季將馬莫殊賣去曼城、前季將高路梅安尼賣去巴黎聖日耳門(見表)。據《The Athletic》統計，法蘭克福近6年賣前鋒收購接近4億歐元，相當和味。

法蘭克福近6年賣前鋒紀錄

高路梅安尼 →巴黎聖日耳門 9,500萬歐元

伊基迪基 →利物浦 9,100萬歐元

馬莫殊 →曼城 7,500萬歐元

盧卡祖域 →皇家馬德里 6,300萬歐元

施巴斯坦賀拿 →韋斯咸 5,000萬歐元

安達施華 →RB萊比錫 2,300萬歐元