【官宣】阿仙奴夏天第5簽　摩斯基拿新加坡閃電現身

英超勁旅阿仙奴周四(24日)宣布，西班牙中堅基斯甸摩斯基拿由華倫西亞加盟，轉會費為1,300萬鎊，雙方簽約5年，佢將會着3號波衫。有趣嘅係，摩斯基拿喺官宣轉會前，原來已經飛去新加坡會合喺當地集訓嘅大軍，周日(27日)對紐卡素嘅熱身賽有望首演。

只得21歲嘅摩斯基拿，近2年成為華倫西亞必然正選，對上兩季西甲分別踢36場同37場，阿仙奴領隊阿迪達表示：「歡迎摩斯基拿，作為一個21歲後衞，佢已有豐富西甲經驗同穩定表現，摩斯基拿好聰明而且有速度，踢中間同兩邊都得，係個有好高潛力嘅球員。」阿仙奴夏天先後簽入蘇比文迪、阿列沙巴拿加、基斯甸諾加特同馬度基，摩斯基拿係今夏第5個新兵。

阿仙奴大軍目前喺新加坡集訓，摩斯基拿簽約後會即刻飛去亞洲，勢估唔到喺官宣之前，已有球迷見到摩斯基拿喺新加坡，同蘇比文迪、大衞拉耶等「師兄」一齊行街，據報佢已經跟大軍練過波，嚟緊對紐卡素，同埋之後香港站對熱刺，球迷有望見到佢落場。