女三獅社媒榜3甲　阿仙奴幫玩晒

英格蘭女足再度打入女子歐國盃決賽，隊中成員人氣進一步攀升，據報「女三獅」隊中社交平台人氣最高前3名，全屬阿仙奴女足成員，順序係隊長莉亞威廉臣、前鋒基莉同阿歷西亞蘿素。

「女三獅」人氣最高係隊長莉亞威廉臣，芳齡28歲嘅佢走「女強人」路線，其社交平台除咗一般比賽相外，間中會見到佢着辦公室套裝同美艷晚裝，IG追隨者多達110萬，TIKTOK追隨者亦有23.1萬，每更新一個PO，就會得到8,940鎊收入(約9.44萬港元)。

第2位係前鋒基莉，佢係上屆女子歐國盃決賽射入加時絕殺入球，擊敗德國女足嘅捧盃功臣，上場4強歷史重演，加時攻入絕殺球擊敗意大利女足，協助球隊再闖決賽，27歲嘅基莉走時尚路線，IG追隨者有97.8萬，TIKTOK追隨者亦有32萬，每更新一個PO就會得到8,093鎊(約8.54萬港元)。

第3位同屬前鋒嘅阿歷西亞蘿素，26歲嘅佢場上表現彪悍，但打扮後形象大變，就像鄰家女孩，IG追隨者有91.2萬，TIKTOK追隨者39萬屬全隊最高，每更新一個PO就會得到7,742鎊(約8.17萬港元)。