巴塞今夏唔再簽人　開新約綁實防線大將

西甲冠軍巴塞隆拿早前以先借後買方式簽入曼聯前鋒拉舒福特之後，組軍工作完成，會長拉波塔表示，今夏唔再會簽新兵。會方下一步工作將同主力傾續約，率先準備同右後衞祖利斯古迪續約至2030年。

巴塞隆拿今夏有3位新球員加盟，包括收購愛斯賓奴門將祖安加西亞、哥本哈根翼鋒巴迪治，以及拉舒福特，拉波塔話組軍工作已完成：「原則上，我哋今夏唔會再簽人，現時已有非常好嘅陣容，教練費歷克希望提拔青訓球員，照目前情況睇，唔需要再買人。」

事實上，由於球員總薪酬超標問題，巴塞隆拿再次面臨新兵無法註冊，甚至拉舒福特都未必可以註冊，巴塞需要放走部份球員，騰出薪酬空間，前鋒柏奧域陀成為最新1位離隊球員，轉投葡超球隊布拉加，巴塞獲得1,200萬歐元(約1.1億港元)轉會費。

另外，祖利斯古迪只剩下2年合約，「轉會權威」記者羅曼諾(Fabrizio Romano)指呢位26歲法國國腳已經同意續約至2030年，佢3年前由西爾爾加盟巴塞隆拿，一直屬於主力，上季上陣53場並有4球進帳。