艾摩廉收貨　曼聯首輪英超正選已定？

曼聯喺「美國之旅」季前熱身賽，以2比1擊敗韋斯咸，領隊魯賓艾摩廉表示，滿意球隊表現，美國傳媒指呢位葡萄牙名帥可能以今場正選陣容，出戰英超首輪賽事對阿仙奴。

新一季英超將於中場休息加插訪問環節，並可以短暫拍攝更衣室情況，賽會利用今次熱身賽預演，上半場結束後，魯賓艾摩廉立即被電視台記者捉住採訪，佢話：「我哋防守穩健，攻守轉換亦做得非常好，但仲需要更長控球時間，亦有唔少地方需要改善，我好欣賞球員嘅努力。」賽後艾摩廉點名大讚前鋒海倫夠晒搏命，但指包辦2個入波嘅般奴費南迪斯有時太心急，可能會做出錯誤決定。

另外，魯賓艾摩廉透露下場對般尼茅夫，新兵麥比奧莫仍然唔會上陣，可能等到8月4日對愛華頓先至披甲。

美國傳媒指曼聯今場正選球員狀態出色，魯賓艾摩廉應該會以呢個陣容迎戰首輪英超對阿仙奴，紅魔鬼今仗排出3421陣式，由門將比恩迪亞把關，3位中堅分別為艾登希雲、馬菲斯迪歷特、約羅，中場有阿密特迪亞路、文路爾烏加迪、明奈、柏德列多古，2位進攻中場般奴費南迪斯、馬菲奧斯根夏輔助單箭頭海倫。