新星杜文堅搶鏡　阿仙奴劏鵲星洲兩連勝

阿仙奴周日（27日）晚展開亞洲之旅第2場「拍跳」，喺新加盟箭頭約基利斯觀戰下，憑新星麥斯杜文博到12碼，以3比2擊敗「喜鵲」紐卡素，於新加坡站連贏2場，為周四（31日）喺香港啟德體育園主場館舉行嘅「北倫敦打吡」鬥熱刺壯行色，約基利斯亦好大機會迎來入「廠」第一擊。

阿仙奴新兵約基利斯簽約後，立即飛去新加坡會合新東家，但由於時間緊迫，鬥紐卡素只係睇波。紐卡素憑安東尼艾蘭加先開紀錄，之後阿仙奴箭頭夏維斯後腳妙傳米基爾馬連奴扳平，加上對手擺烏龍而極速反先。

易邊後大家都不斷換人，「喜鵲」靠積及梅菲遠射得手，去到末段，後備入替嘅兵工廠新星麥斯杜文殺入禁區被對手侵犯，博到12碼，隊長馬田奧迪加特操刀破網，最終險勝3比2。年僅15歲嘅麥斯杜文，在新加坡兩場都表現搶鏡，相反夏維斯雖然今場交出助攻，但連續兩場冇士哥，周四喺香港鬥熱刺，睇嚟要靠新兵約基利斯數胡。