曼聯Vs紐卡素　掀施斯高爭奪戰

今夏轉會市場上具質素中鋒畀人買得七七八八，目前只剩番RB萊比錫嘅班捷文施斯高未有着落，據報一直搵緊中鋒嘅曼聯，同埋今夏瘋狂被「截胡」嘅紐卡素，正齊齊爭奪施斯高，轉會費定價8,000萬歐元(約7.3億港元)。

車路士簽入利安戴納、阿仙奴簽入約基利斯、域陀奧森漢亦快將落實永久轉投加拉塔沙雷，阿歷山大伊沙克又準備由紐卡素過檔利物浦，市場上具質素中鋒各有去向，得番班捷文施斯高去向未定。

德國傳媒報道，施斯高經理人已先後同曼聯及紐卡素對話，內容包括展示未來計劃及個人條件，之前有指紐卡素同球員已達成口頭協議，但其後遭到否定，現時決定權仍然在球員手中，RB萊比錫定價為8,000萬歐元。