車路士未夠喉　使多9億斟荷蘭孖寶

剛贏得世冠盃嘅車路士繼續增兵，據報佢哋睇中荷蘭孖寶，包括阿積士19歲左閘祖列爾哈圖，同埋RB萊比錫22歲翼鋒沙維西蒙斯，兩名球員轉會費合共1.05億歐元(約9.6億港元)。

車路士喺世冠盃前夕簽入利安戴納，再喺世冠盃期間簽入祖奧柏度，其後又落實比諾傑坦斯加盟，成功捧走世冠盃後，主帥馬列斯卡下個目標就係衝擊英超冠軍，希望喺開咧前衝刺，繼續增兵。

「轉會專家」羅曼諾報道，車路士同祖列爾哈圖達成個人協議，現正同阿積士談判，交易接近完成，轉會費為3,500萬歐元(約3.2億港元)。

車路士另一目標係RB萊比錫嘅沙維西蒙斯，球員渴望加盟車路士，而車路士正同RB萊比錫就交易結構進行談判，轉會費約需7,000萬歐元(約6.4億港元)。