壓力太大！托迪囝囝19歲宣布掛靴

意大利傳奇球星托迪，2017年以41歲之齡高掛球靴，被譽為球壇其中一個最佳「長青樹」，佢囝囝基斯甸亦子承父業成為職業球員，可惜成就同爸爸就冇得比，只得19歲嘅佢日前更宣布提早退休，結束短暫嘅足球夢。

基斯甸細細個就效力羅馬青年軍，之後效力過丁組球會Avezzano同Olbia，但日前接受《La Nuova》訪問，基斯甸就宣布掛靴：「冇咩好講......冇錯，我決定退休。」意大利記者Paolo Ardovino爆料：「基斯甸喺丁組踢咗幾場，但面對媒體好大壓力，又有社交網上嘅批評，但內容都唔係事實。」

基斯甸前教練艾美利亞亦透露：「我覺得佢可以喺意乙、意丙立足，但因為『托迪個仔』呢個名，影響咗大家對佢嘅評價。」據報基斯甸掛靴之後，將會同哥哥列卡度一齊，為托迪打理喺意大利嘅足球學校。